१ देखि १२ सम्मका उत्कृष्ट विद्यार्थीलाई ‘गंगाराम छात्रवृत्ति’
![१ देखि १२ सम्मका उत्कृष्ट विद्यार्थीलाई ‘गंगाराम छात्रवृत्ति’](https://www.saralpatrika.com/wp-content/uploads/2023/06/Untitled-design.png)
इलाम । दिवंगत गंगादेवी घिमिरे र रामप्रसाद घिमिरेको नाममा स्थापित ‘गंगाराम घिमिरे अक्षयकोष’ ले माईजोगमाई गाउँपालिकास्थित नामसालिङ माध्यमिक विद्यालयका विद्यार्थीलाई छात्रवृत्ति प्रदान गरेको छ ।
कक्षा एकदेखि १२ सम्म पहिलो, दोस्रो र तेस्रो हुने विद्यार्थीहरुलाई छात्रवृत्ति प्रदान गरिएको हो ।
अमेरिका निवासी जेठा छोरा मोहन घिमिरे र बुहारी बिष्णुमाया घिमिरेद्वारा दिवंगत आमा गंगामाया घिमिरे र पिता रामप्रसाद घिमिरेको नाममा स्थापना गरेको ६ लाख २५ हजारको अक्षयकोष गत वर्ष घोषणा गरिएको थियो ।
कोषको वार्षिक ब्याजबाट प्रत्येक वर्ष विद्यार्थी हरुलाई छात्रवृत्ति प्रदान गर्न थालिएको विद्यालयका प्रधानाध्यापक प्रदिप देबले बताए ।
विद्यालय व्यवस्थापन समितिका अध्यक्ष यज्ञनिधि अधिकारीको अध्यक्षतामा सम्पन्न कार्यक्रममा दाताहरुको तर्फबाट गीता आचार्य, भेषराज घिमिरे र डेगकुमारी घिमिरेको सहभागिता थियो ।
विद्यालय व्यवस्थापन समितिका अध्यक्ष यज्ञनिधि अधिकारी, प्रधानाध्यापक प्रदिप देब र माईजोगमाई गाउँपालिका वडा नम्बर ४ का अध्यक्ष राम घिमिरेले छात्रवृत्ति हस्तान्तरण गरेका थिए ।
अक्षयकोषलाई भविष्यमा बढाउँदै लैजाने लक्ष्य रहेको अक्षय कोष सञ्चालक समितिका सदस्य भेषराज घिमिरेले बताए ।
गरिब र जेहेन्दार विद्यार्थीहरुलाई अध्ययनका लागि सहयोग पुगोस् भन्ने उद्देश्यले अक्षयकोष स्थापना गरिएको दाता डेगकुमारी घिमिरेको भनाई छ ।
गंगाराम अक्षयकोषले विद्यार्थीहरुलाई प्रेरणा र हौसला प्रदान गर्ने विश्वास लिइएको व्यवस्थापन समिति अध्यक्ष अधिकारीले बताए ।